Eph 6 | ASO | STEP | Ido' Kilisitoda gi'mizi minave nete igi mili ilizado' o neine' monovolo' nene izipe lingine izetingine metingine gelekele' i-ngidi minilizado' lisihe' o neine' nenaze. Lingine gelekele' i-ngidi minilo.

Ephesians 6

Izipaha'inesi Ize'ninge Me'ningesi Igi Mili Miniliza Monovomu' Paulo' Lo-ngimine' Gamazi

1 Ido' Kilisitoda gi'mizi minave nete igi mili ilizado' o neine' monovolo' nene izipe lingine izetingine metingine gelekele' i-ngidi minilizado' lisihe' o neine' nenaze. Lingine gelekele' i-ngidi minilo. 2 Nemu' nene mono' godolou' ti' li gizi nizani' ma neive:

Lingine izetingine metinginemu' gilikevo dizo minavo na'na' i-ngidi minilo.
Ne'mino neine' nenako Mose' aza aka gamazi muki' nene gize'mo nolemo a'mida nene O'moso'mo do lamine' o-ledelesa lo huko line' gamazi imine' molo ma gizamo a'mine mene luvoni' gamazi malo' nene gana' api' ogo ne'mine gamazi ma imine' molo ti' lo gizine' ve:

3 Lingine izetingine metinginemu' gilikevo dizo minavo na'na' i-ngidi minilizani' ne'mo nene naza lokuvo
misubouko mene vetinesi gamene ha'na lamine' ha mini di vi minilisave.
4 Ido' ize'ninge me'ninge lingine izipahatine nene ngizebolo' molali inite' inite' i-ngidami Guvelesi ve'mi monovomu' apizi ngimi eze aka'velo' e'meti vi minilizangumu' ve li di hehe li-ngidi minilo.

Gonou' Vesi Gizebo Ve'inesi Igi Mili Minilizani' Monovomu' Paulo' Lo-ngimine' Gamazi

5 Ido' gonou' ve lingine nene Kilisito' gamazi lido' gili di minani' gilivosa me misubouko gizebo i-lingidaa' navetine nene evene' nabate nizave li engikumu' lengehelele izivo mini lutine mili hamo' gehepeve i mini lilizado' gili di gelekele' i-ngidi minilizave. 6 Ido' gonou' ve lingine gizebo vete nete lezemu' ningi lamine' gililizave li engi' ve'nido' nene gono amuzo mili daa' nave gili gono di minisa ido' alinge' gizebo vetine nete ningamavo gono gilizevo igi di minaa' nani' ne'mine nene amilo. Kilisito' goboni ve gihilelite gono dalizani' monovo lisihetokovo' nene e'meti O'moso'mo gilido' nene e'meti gizebo vetine nete gono lingimilizani' nene lutine laminetotikovo' dalo. 7 Ee, evenekumu' gono dami asi Guvelesi vemu' gono dani' gilivosa lingine nene lutine lamine' o minivo a'mine gizebo vetine nete gono lingimilizani' nene dalo. 8 Lingine mo gili nizani' ma neive. Ve malite gono lamine' dalizani' nene Guvelesi ve'mo meni lamine' ngemeleseive. Ido' a'mine ve nene gelekele' ve nilizahe ido' gelekele' ve minami haza ve nilizahe a'mine hamo hamo' mukito' nene gono dalizani' votigilelo' votigilelo' ogo meni ngemeleseive. 9 Ido' gonolo' veti gizebo ve'ine lingine a'mine'mine igi gonou' vetine nene monovo laminekovo' i-ngidilo. Lingine gili nizave. Gizebo ve lengi' nesi gonou' ve nesi gizebo vetine hamo' minive nene Okulumoku' Guvelesi ve hamo' nene neive. Ido' aza nene ningivo laza linge ma dizo nonivo linge ma limi minikevo minamo laza mukito' nene lisihetokovo' none. Nemu' nene gizebo ve lingine gonou' ve nene gono amuzo mili dalizangumu' ve li golise gililiza inite' inite' i-ngidaa' nani' nene huli monovo laminekovo' i-ngidilo.

O'moso Biluva' I-daa' Ave Lovo O-ngemeloningumu' Nene Laza O'mosolati' Lovo Hizaa' Inite' Dosa Mineloningumu' Paulo' Lo-ngimine'

10 Ido' naza gamazi lo osu' nolo ti' lo noluve. Lingine Guvelesi vela vi gi'mizi mini eitatikisi amuzo disa ele'vole' igi minilo. 11 Satani ne'mo gotine izo do gopo'napa o-lengedo lingivile' olosa iline' nene lingine mo limi ingami ha ele'vole' igi oti minilizangumu' ve li O'mosolati' lovo hizaa' inite' muki' nene di okodida igisa minilo. 12 Ido' laza ne'mino lovo hizaa' inite' O'mosolati' do ngolo minelone' nene nanitekumu' ve. Laza lovo olone' nene haza evene' leli' okodesi ne'mine minani' nene lovo o-ngemelone' nevoba asi Satani'mi zuho goloso guve'inesi ve naba amuzo'ine ato atokisi minave okulumo' gahevela minaa' nani' inite' ingine nene me misubouko evene' liti'musou' ne'mine ha minavelo' nene amuzo mala' mala' i-ngidi gizebo i-ngidi minaa' nave engikisi lovo hizelone' nemu' nene O'mosolati' lovo hizaa' inite' nene do ngolo minelone. 13 Nemu' nene Satanilati' ve goloso ingine lovo i-lingimilizangu' nene lingine limi ingami ha oti pehe li amuzo mili mini mo ngivile' igi osu' li minilizangisi O'moso'mo lovo hizaa' inite' muki' lemaa' neine' nene ha di minilo. 14 Ido' ne'mine igi lingine lovo hizi ngivile' ilizangumu' ve li ele'vole' igi oti mini gamazi laminetokovo' laa' monovo ne'mo nene gopotido' leti ne'mine lolo' ogo minavo ido' monovo lisihe' ogo molo minaa' ne'mo nene losodido' lepese ne'mine lolo' ogo minavo 15 ido' mono' gamazi lamine' hongu lo minaa' monovomu' lo-lemaa' neine' ne'mo nene lisi ngi li minilizangumu' suu' ne'mine lolo' ogavo 16 inite' linge muki' ne'mine disa Kilisito'nimu' gili ele'vole' iga' nani' nedunu' nene ve golosolati' olo' lo minine' elese aline' nene bili lihizi di hulilizado' i minilizani' nenako nemu' nene a'mine gili ele'vole' iga' nani' ne'mo nene lepese naba ne'mine lolo' ogavosa di minilo. 17 Ne'mine igi O'moso'mo do lu' izaa' neine' ne'mo nene lovo angilitine ainidunu' lili' ani' ne'mine lolo' ogavo di gihi mini O'moso'mi gamazi ei' Sikalahu'veli'mo lengemaa' neine' ne'mo nene bainati mite' ne'mine lolo' ogavo di minilo. 18 Ne'mine igi mini lingine nene O'moso'mi Sikalahu' ne'mi amuzololo' nene gamene gamene O'mosola li mini inite' nanitekumu' vise' ilizahe nemu' nene O'mosola livo' minilo. Ne'mine ilizangumu' nene gosele' lengebelamivo lutine okise ongamivo mini O'moso'mi zuho muki' engikumu' nene O'mosola livi' livi' igi minaa' ilo. 19 Ido' naza Izesu' velemu' ogo ezemu' gamazi lamine' gomu' suno' minine' nene lo soto' oga' nouve nouvoni' nenako nemu' nala' numungu' huli-nidikevo nouvongukisi a'mine gamazi lamine' nene lovo' kiselevo' ogo lo soto' olodo' o neine' nenako nemu' nene lingine O'mosola lilizangu' nene lovo' kiselevo' ogo lo soto' olongumu' ve li nenikumukisi nene Guvelesi ve'mo ve'ne do lapa nomine' ogavo a'mine gamazi lamine' nene nehelele izamivo ve'ne telo lo soto' olongumu' ve li O'mosola nenikumu' lilo.

Paulo' Luhuvo Gize Osu' Lolosa Geke' Lo-ngedo Gizine' Gamazi

21 Naza mela mine molo nouvongumukisi ido' gono do nouvongumukisi nene Tikiko' vo lo-lengeme osu' lilive lo imiselekuvo novive. Aza nene Kilisito' aleve leli' zuho Guvetesi ve'mi gelekele' izipe've lisihe' lamine' neivo lu'ne emaa' nouve minive 22 ne'mo leli' gamazi nene lo-lengemo muludingu' do lamine' ilive lo imiselekuvo lengita nesene novive.

23 O'moso metehosi ido' Guvelesi ve Izesu' Kilisitokisi ingine hongu lo minaa' monovo nene neze zuho lengita di soto' i-lingidi ido' lingine engikumu' gili ele'vole' ado' nene imine' mili lutine ge neme ne geme li minilizani' amuzo nesi nene di soto' i-lingidilisiho. 24 Ido' lingine Guvetesi ve Izesu' Kilisitoda gi'mize lamine' igi lutine mudise ele'vole' igi imaa' ani' aleve mukita nene O'moso'mi nasahili' ne'mo mine molo minivo.

Moda ve.